ਕਪਾਹ ਪੰਜਾਬ ਦੀ ਇੱਕ ਵੱਡਮੁੱਲੀ ਵਪਾਰਕ ਫਸਲ ਹੋਣ ਸਦਕਾ ਇਹ ਪੰਜਾਬ ਦੀ ਕਿਰਸਾਨੀ ਦੀ ਆਰਥਿਕ ਸਥਿਤੀ ਤੇ ਬਹੁਤ ਅਸਰ ਪਾਉਂਦੀ ਹੈ। ਕਪਾਹ ਦੀ ਫਸਲ ਤੇ ਕੀੜੇ ਬਿਜਾਈ ਤੋਂ ਲੈ ਕੇ ਪੱਕਣ ਤੱਕ ਨੁਕਸਾਨ ਪਹੁੰਚਾਉਂਦੇ ਰਹਿੰਦੇ ਹਨ। ਜਿਨ੍ਹਾਂ ਵਿੱਚ ਅਮਰੀਕਣ ਸੁੰਡੀ, ਚਿੱਟੀ ਮੱਖੀ, ਤੰਬਾਕੂ ਸੁੰਡੀ ਅਤੇ ਹੁਣ ਮੀਲੀ ਬੱਗ ਮੁੱਖ ਕੀੜਿਆਂ ਦੀ ਸੂਚੀ ਵਿੱਚ ਆਉਂਦੇ ਹਨ। ਇਨ੍ਹਾਂ ਦੀ ਸੁਚੱਜੀ ਰੋਕਥਾਮ ਲਈ ਸਰਵਪੱਖੀ ਕੀਟ ਪ੍ਰਬੰਧ ਅਪਨਾਉਣਾ ਬਹੁਤ ਜ਼ਰੂਰੀ ਹੈ ਤਾਂ ਜੋ ਇਨ੍ਹਾਂ ਦੀ ਗਿਣਤੀ ਨੁਕਸਾਨ ਵਾਲੇ ਪੱਧਰ (ਆਰਥਿਕ ਕਗਾਰ ਤੋਂ ਉੱਪਰ) ਤੱਕ ਨਾ ਪਹੁੰਚੇ ਅਤੇ ਨਾਲ-2 ਸਾਡੇ ਮਿੱਤਰ ਕੀੜੇ ਵੀ ਬਚੇ ਰਹਿਣ। ਇਨ੍ਹਾਂ ਦੀ ਸੁਚੱਜੀ ਰੋਕਥਾਮ ਲਈ ਕੀੜਿਆਂ ਦੀ ਜਾਣ ਪਹਿਚਾਣ, ਜੀਵਨ-ਚੱਕਰ ਅਤੇ ਸਰਵਪੱਖੀ ਰੋਕਥਾਮ ਬਾਰੇ ਜਾਣਕਾਰੀ ਹੋਣਾ ਅਤਿਅੰਤ ਜ਼ਰੂਰੀ ਹੈ।

ਸਹੀ ਗਿਆਨ ਅਤੇ ਜਾਣਕਾਰੀ ਕੀਟ ਪ੍ਰਬੰਧ ਬਾਰੇ ਫੈਸਲਾ ਲੈਣ ਲਈ ਮੁੱਖ ਪਾਤਰ ਹਨ। ਸਰਵਪੱਖੀ ਕੀਟ ਪ੍ਰਬੰਧ ਸਹੀ ਫੈਸਲਾ ਸਹਿਯੋਗ ਪ੍ਰਣਾਲੀ ਤੇ ਜ਼ੋਰ ਦਿੰਦਾ ਹੈ ਜੋ ਕਿ ਕਿਸਾਨਾਂ ਨੂੰ ਸਮਪੂਰਣ, ਸਹੀ ਅਤੇ ਸਮੇਂ ਸਿਰ ਜਾਣਕਾਰੀ ਦੇਣ ਤੇ ਅਧਾਰਿਤ ਹੈ। ਫੈਸਲਾ ਸਹਿਯੋਗ ਪ੍ਰਣਾਲੀ ਖੌਜ ਤੇ ਪ੍ਰਸਾਰ ਵਿਗਿਆਨੀਆ ਅਤੇ ਕਿਸਾਨਾਂ ਵਿੱਚ ਆਪਰਕ ਵਧਾਉਦੇ ਹੋਏ ਤਕਨੀਕੀ ਜਾਣਕਾਰੀ ਦੇ ਵਟਾਂਦਰੇ ਨੂੰ ਮਜਬੂਤ ਕਰਦਾ ਹੈ। ਖੋਜ ਅਤੇ ਪ੍ਰਸਾਰ ਵਿਗਿਆਨੀਆਂ ਨੂੰ ਨਵੀ ਤੋ ਨਵੀ ਜਾਣਕਾਰੀ ਹੋਣਾ ਜਰੂਰੀ ਹੈ ਤਾਂ ਜੋ ਉਹ ਭਵਿੱਖ ਵਿੱਚ ਖੋਜ ਕਾਰਜਨੀਤੀ ਤਿਆਰ ਕਰ ਸਕਣ। ਇੰਨਟਰਨੈਟ ਤੇ ਸਰਵਪੱਖੀ ਕੀਟ ਪ੍ਰਬੰਧ ਬਾਰੇ ਪਹਿਲਾ ਤੋ ਹੀ ਕਾਫੀ ਜਾਣਕਾਰੀ ਮੌਜੂਦ ਹੈ ਪਰ ਇਹ ਇਕਾਗਰਿਤ ਰੁਪ ਵਿੱਚ ਨਹੀਂ ਹੈ।